Free Web Site - Free Web Space and Site Hosting - Web Hosting - Internet Store and Ecommerce Solution Provider - High Speed Internet
Search the Web

香港奧運游泳王子

方力申秘密日記連載

Yes! No.495

Hi ! 大家好 ! 我係方力申Alex , 今日--九月十五號對我嚟講意義好。因為我依家正參加緊澳洲悉尼奧運開幕禮 , 嚟緊呢一個月會同世界各地嘅頂尖運動員喺游泳池中一較高下。雖然大家嚟唔到現場幫我打氣 , 不過都可以由我嘅秘密日記中分享我嘅一切開心與唔開心。

「一歲時我被人由二樓掟落海」

掟我落海嗰個咪係我爸爸囉 ! 嗰日我地全家一齊坐游艇出海玩 , 玩玩下我爸爸見到隔離船有幾個外國人係咁掉啲細路落海 , 好似好好玩 , 佢又貪玩學人囉 ! 嗰陣時佢自己跳咗落海先 , 跟住就叫我媽咪掟我落海。佢嗰陣係準備接住我㗎 , 不過我媽咪係由二樓船艙掟我落嚟嗰陣 , 我根本唔識游水 , 淨係戴咗兩隻吹氣水袖咋 ! 結果佢當然接唔住我 , 而我就一直沉入水裡面 , 依家仲依稀記得入水嗰吓喺咁衝入水嘅情景呀 ! 雖然好快我就自己升返上嚟 , 但係我爸爸就嚇到死死吓 , 以後都唔敢玩呢啲嘢。
「最佳學游水方法係唱歌學游水」

其實我屋企三代游水都好叻㗎 ! 我爺爺以前已經成日參加游水比賽 , 攞過好多獎 。我爸爸以前都有參加泳隊 , 游水都好叻。佢認為我呢代嘅後生仔實在冇乜捱苦 , 所以一定要我同細路學游水、做多啲運動 , 令身體健康之餘亦學到刻苦忍耐。

到咗幾歲爸爸就開始教我游水嘞 ! 我仲記得佢係喺置富花園泳池教我嘅。佢用嘅方法都幾好㗎 ! 大家都可以試吓。首先凡佢叫我訓喺水上面 , 然後用手托住我 ; 叫我一路踢水一路唱歌 , 嗰陣我好鍾意<大武士>呢套卡通片 , 所以我就好大聲、好開心咁不斷唱歌。唱唱吓 , 游游吓爸爸就慢慢鬆手 , 就咁我就唔驚水兼慢慢學識游水喇 !

「爸爸日日陪我練水 , 有次仲搞到病咗」

學識游水之後 , 我嘅游泳事業可以話一帆風順 , 冇受傷亦不斷攞獎贏比賽。由九歲入南華會泳隊 , 十歲已經第一次參加比賽同得到名次。十一歲代表香港參加亞太分齡賽、十二歲開始破香港分齡記錄、十五歲首破香港記錄 , 直到依家仍然保持八項香港記錄。

為咗保持狀態 , 我對於練水非常認真。平時一個星期練八次水 , 暑假更會一個禮拜練十一次 ; 逢星期一至五上下晝各練水一次 , 星期六練一次 , 每次個半鐘。有一段時間為咗爭取練水機會 , 我更試過每朝五點半起身練水 , 然後先返學。不過維持咗三個月我就放棄 , 因為咁練法唔單止搞到自己唔夠精神返學 , 教練又話影響到下晝練水課嘅表現。最慘都係由細到大都日日陪我練水嘅爸爸 , 亦因為太勞碌而搞到病咗。我維有放棄晨早練水啦 !
「最難忘係98年亞運......個個都游到破香港記錄 , 可惜仍然攞唔到牌。」

98年亞運係我最難忘嘅一個比賽 , 為咗喺亞運得到好成績 , 我一年前已經開始備戰。當時為咗一面 4 x 200自由式接力獎牌 , 我同郭健明、李繼賢、莫法特四個好用心咁練水 , 我更毅然放棄自己嘅強項四百米個人四式。比賽時我地一直保持第三位 , 我自己亦破咗個人200自由泳最佳記錄 , 快咗兩秒 , 而其他隊友都有游快咗好多。點知到最後廿五米時竟然畀韓國隊爬頭 , 最後得個第四名。雖然攞唔到獎牌 , 但係今次我哋聯手破咗香港記錄 , 足足比記錄快咗10秒咁多。

「游水令我唔再怕羞 , 面皮都厚啲」

游水對我嚟講 , 實在太重要嘞 ! 佢唔止令我身體健康 , 仲改變咗我嘅性格。話個秘密畀大家知 , 其實我由細到大都好怕羞、面皮薄、亦唔鍾意同人爭。我唔咁同陌生人講嘢 , 試過有記者行埋嚟訪問我 , 我怕羞到唔知講乜 , 唯有唔出聲。但係游水後我就逐漸改變 , 依家冇咁怕羞 , 有人行埋嚟同我傾偈 , 我都識同佢講幾句。

另外我仲好怕同人爭 , 好似排列過關咁有好多人都鍾意打尖、鍾意插隊迫埋嚟 , 正常嚟講係應該叫呢啲人排隊守秩序 , 因為咁對後面排緊隧嘅人好唔公平 ; 但係我就會由得佢哋打尖 ,我唔鍾意同人爭 , 你想行先咪行先囉 ! 但係呢個缺點真係好難改、